Ísland þarf ekki að greiða fyrir 4.409 tonn

Samningar hafa tekist á milli íslenskra, norskra og rússneskra stjórnvalda um þorskveiðar íslenskra skipa í lögsögu Noregs og Rússlands. Um er að ræða framhald svokallaðs Smugusamnings sem gerður var árið 1999 af hálfu Íslands, Noregs og Rússlands, en hann kveður á um tvenns konar kvóta, annars vegar kvóta sem ekki er greitt fyrir og hins vegar kvóta sem Ísland fær ef samningar takast um verð.

Samningar hafa tekist um fyrrnefnda kvótann og verður heildarmagn þess þorsks, sem ekki þarf að greiða fyrir, alls 4.409 tonn. Heimill verður þá 30% meðafli ofan á þetta magn, en þó má magn ýsu ekki nema meiru en 352 tonnum.

Fram kemur í tilkynningu frá atvinnuvega- og nýsköpunarráðuneytinu að eftir eigi að ganga frá samningum um verð fyrir þann kvóta sem kaupa má, en hann er í ár ákveðinn alls 2.646 tonn.

Með honum fylgir einnig 30% meðafli, en þar eru takmörk á ýsu 265 tonn.

Í samkomulagi stjórnvaldanna felst enn fremur að Rússland fær 1.500 tonn af makríl til veiða á úthafinu, af makrílkvóta Íslands.

• Blogga um frétt