Fyrirtækið Landeldi ehf. hefur boðað til íbúakynningar í Þorlákshöfn í dag klukkan 17.30. Tilefnið er áform fyrirtækisins um að koma á fót allt að fimm þúsund tonna eldi á laxfiski í sveitarfélaginu. Athygli hefur vakið að fyrirhugað er að eldið fari að öllu leyti fram í landi, við sjávarsíðuna.

Stefnt er að því að fara á fundinum yfir gerð og framkvæmd verkefnisins, skipulag þess, matsáætlun, áhrif og stefnu, auk þeirra áhrifa sem verkefnið mun hafa á atvinnumöguleika íbúa.

Eldið verði sem vistvænast

Samkvæmt upplýsingum frá fyrirtækinu hefur verkefnið verið í vinnslu í um tvö ár og er lagt upp með að eldið verði sem vistvænast, með tilliti til notkunar náttúrulegra auðlinda og úrvinnslu á hráefni, auk meðferðar úrgangsefna.

„Við höfum það að markmiði að skila sem vandaðastri vöru til að tryggja inngöngu á verðhæstu markaði, og tryggja að verkefnið í heild styðji við atvinnulífið í Þorlákshöfn, þar sem öll vinnsla verði í heimahéraði,“ segir Ingólfur Snorrason, sem er í forsvari fyrir fyrirtækið.

Tengdar fréttir

Fiskeldi

„Margt hefur nú ekki beinlínis verið til fyrirmyndar“

• Segir nýtt frumvarp gefa eldisfyrirtækjum auðlindir
• Laxey fær sex milljarða
• Fjárfestingin 115 milljarðar króna
• Bátur Arnarlax verður fyrsti sinnar tegundar

» Fleiri tengdar fréttir