Náði 1.400 tonnum í sól og blíðu

Hoffell kom til hafnar á Fáskrúðsfirði 1.400 tonn af loðnu á þriðja tímanum í dag. Var veiðitúrinn vel heppnaður í alla staði en hann tók aðeins um 35 klukkustundir. Að sögn Bergs Einarssonar skipstjóra var aflinn fenginn með þremur köstum úti af Tjörnesi, þar sem sólin skein og veður var gott.

„Loðnan er fín og full af hrognum en sjötíu prósent af aflanum er kerling,“ er haft eftir Bergi á vef Loðnuvinnslunnar. „Ég var ekkert að eltast við karlana,“ bætti hann kankvís við.

• Blogga um frétt