Áhöfnin aldrei séð annað eins

Óvæntur afli fékkst um borð í Ljósafellið, skip Loðnuvinnslunnar á Fáskrúðsfirði, þegar hún var á svokölluðu togararalli í þjónustu Hafrannsóknastofnunar. Hjálmar Sigurjónsson, skipstjóri á Ljósafellinu, segir áhöfnina aldrei hafa séð annað eins.

Um var að ræða stærsta grjót sem áhöfnin hefur orðið vitni að um borð í skipi. Segir skipstjórinn ótrúlegt að trollið hafi haldið og dregur þá ályktun að grjótið hafi komið í trollið í blálokin á drættinum.

„Ef trollið hefði dregið þetta grjót eftir botninum hefði komið gat, um það er ég alveg viss,” segir Hálmar, en fjallað er um atvikið á vef Loðnuvinnslunnar.

Reyndist grjótið það þungt að notast var við spilið til að koma því aftur í sjóinn, þar sem kraninn um borð tekur „aðeins“ rúmlega fjögur tonn.

Hjálmar hefur verið til sjós lengi og segist muna eftir að hafa fengið ýmsan óvæntan afla, eins og eitt sinn þegar veiða átti ýsu en upp með trollinu komu sjö tonn af urrara. Í annað sinn komu þá upp tíu tonn af háfi, öllum að óvörum. Tegundir sem ekki geta talist algengur togarafiskur.

• Blogga um frétt