Fín hrognaloðna í litlum en varhugaverðum torfum

Góður loðnuafli fékkst í gær og í fyrradag á Kópanesgrunni út af Patreksfirði. Jón Axelsson, skipstjóri á Álsey VE 2, sagði upp úr hádegi í gær að vel gengi, en þá voru þeir búnir að fá tvö 800 tonna köst í góðu veðri og vantaði um 100 tonn upp á fullfermi.

„Þetta er fín hrognaloðna í litlum og þéttum en varhugaverðum torfum,“ segir Jón í Morgunblaðinu í dag. „Ef maður lokar of mikið inni getur farið illa og einhverjir bátanna lentu í að sprengja næturnar.“

Jón segir mjög erfitt að segja hvort um vestangöngu væri að ræða, en sagðist frekar hallast að því að svo væri ekki. „Þessi fiskur þokast norðaustur og ég get vel trúað að hann sé að koma sunnan að. Hann hafi gengið dreift og síðan þétt sig hérna. Hrognin eru þroskuð og í góðu standi, en í vestangöngum eru hrognin ekki alveg svona langt komin,“ segir Jón.