„Nóg af loðnu á miðunum enn“

Það er skömm að þessi loðnuvertíð er búin, því nóg er af loðnu á miðunum enn, segir Bergur Einarsson, skipstjóri á Hoffellinu. Skipið er nú á heimleið með síðasta loðnufarminn, 900 tonn, og hefur því lokið við að veiða allan loðnukvóta sinn, samtals 8.600 tonn.

Að sögn Bergs var aflinn veiddur í Hrútafjarðarál, sem þykja ekki algeng mið fyrir loðnuveiðar.

Fram kemur í tilkynningu frá Loðnuvinnslunni á Fáskrúðsfirði að loðnan sé falleg, u.þ.b. 65% hrygnur, og fari öll til hrognatöku hjá Loðnuvinnslunni. Aðspurður segir Bergur að veiðin hafi gengið mjög vel, spegilslétt haf, sól og blíða.

Nú þegar loðnuvertíðin er yfirstaðin verður farið í að skipta um veiðafæri á skipinu; nótinni sem loðnan er veidd í er þá skipt út fyrir flottroll til þess að veiða kolmunna sem, ef að líkum lætur, mun fylla lestir Hoffellsins áður en langt um líður.

• Blogga um frétt