Stofnunin dregur álit sitt til baka
Setja bókamerki
Skipulagsstofnun hefur dregið til baka álit sem stofnunin gaf út í gær. Í álitinu lagðist stofnunin gegn fyrirhuguðu 6.800 tonna laxeldi fyrirtækisins Háafells í Ísafjarðardjúpi.
Ásdís Hlökk Theodórsdóttir, forstjóri Skipulagsstofnunar, staðfestir í svari við fyrirspurn mbl.is að álitið hafi verið kynnt Háafelli og umsagnaraðilum í gær en dregið til baka að ósk Háafells.
Segir hún að stofnuninni hafi ekki verið kunnugt um að Háafell legði áherslu á að fá tækifæri til að leggja fram frekari upplýsingar áður en gengið yrði frá áliti stofnunarinnar.
„Var því orðið við ósk hans og álitið dregið til baka,“ segir Ásdís.
Áhætta á erfðablöndun og laxalús
Fyrst var greint frá því að álitið hefði verið dregið til baka á fréttavef Bæjarins besta, bb.is.
Segir þar að í álitinu hafi komið fram að stofnunin legðist gegn eldi á frjóum laxi í Ísafjarðardjúpi. Teldi hún að áhrif laxeldis Háafells á villta laxastofna í Ísafjarðardjúpi yrðu líkleg til að vera verulega neikvæð. Tók hún undir með Hafrannsóknastofnun um að ekki ætti að leyfa eldi á frjóum laxi í Ísafjarðardjúpi miðað við fyrirliggjandi áhættumat.
Þá hafi þess verið getið að Skipulagsstofnun teldi að matsskýrsla Háafells uppfyllti skilyrði laga og reglugerðar um mat á umhverfisáhrifum og að umhverfisáhrifum hafi verið lýst á fullnægjandi hátt.
Einnig teldi stofnunin að helstu neikvæðu áhrif fyrirhugaðs laxeldis Háafells við Ísafjarðardjúp felist í áhrifum á villta laxastofna vegna áhættu á erfðablöndun, aukinni hættu á að fisksjúkdómar og laxalús berist í villta laxfiska, áhrifum á botndýralíf og eðlisþætti sjávar.
Eyjafjarðarbraut lokað vegna alvarlegs umferðarslyss
Skar höfuðleðrið af íslenskri konu
Skemmtiferðaskip hætt komið nærri Viðey
Verðbólgan komin niður í 6%
„Á réttri leið en nokkuð í land ennþá“
Árshátíð ríkislögreglustjóra haldin í Tékklandi
Veiting hvalveiðileyfis ekki brot á EES-samningi
„Okkur miðar í rétta átt“