Þrír vopnaðir verðir um borð

„Þetta hefur allt gengið mjög vel nema hvað hitinn hefur verið að angra okkur,“ sagði Magnús Ríkarðsson, skipstjóri á Breka VE, um hádegi í gær.

Páll Pálsson ÍS, nýr togari Hraðfrystihússins Gunnvarar á Hnífsdal, og Breki, nýsmíði Vinnslustöðvarinnar i Vestmannaeyjum, áttu þá um tólf tíma eftir í höfn í Kólombó á Srí Lanka eftir 15 daga siglingu frá skipasmíðastöð í Kína. Í Kólombó á að taka olíu og vistir, en einnig fara þrír vopnaðir öryggisverðir um borð í hvort skip.

Sjórán hafa verið tíð fyrir ströndum Sómalíu þó svo að dregið hafi úr þeim síðustu ár. Frá 2005 til 2012 voru gerðar linnulitlar árásir á skip undan hinum fjölförnu ströndum Sómalíu og var lausnargjalda krafist fyrir áhafnir og skip. Í fyrra var tilkynnt um níu sjórán á svæðinu samkvæmt alþjóðlegri skráningu, en samkvæmt upplýsingum Magnúsar á Breka voru sjórán og tilraunir til þeirra um 60 talsins á síðasta ári, en í mörgum tilvikum var nóg að stugga við ræningjunum.

Sjá viðtal við Magnús í heild í Morgunblaðinu í dag.