„Hélt að við færum niður“

Báturinn Manni ÞH-88 er kominn í höfn eftir að hafa tekið niðri við Rauðanes í morgun. „Ég hélt fyrst að báturinn væri að fara niður og við vorum komnir í gallana," sagði Sæmundur Einarsson, útgerðarmaður og eigandi Manna í samtali við mbl.is.

Frétt af mbl.is

Tók niðri við Rauðanes

„Við vorum að draga gráslepputrossur við Rauðanes og þarna eru strýtur og grynningar sem ég taldi mig vera kominn fyrir en svona fór þetta nú," sagði Sæmundur sem telur það eitt skipta máli að mannskapinn sakaði ekki en blíðuveður var á þessum slóðum.

Báturinn Þorleifur frá Grímsey var á netaralli á svipuðum slóðum og var kominn til Manna í kringum hálftíma eftir að hann tilkynnti óhappið, að sögn Sæmundar. 

Þorleifur dró Manna til hafnar en björgunarbátur Hafliða á Þórshöfn tók við rétt við höfnina og dró Manna að bryggju. Eftir er að kanna skemmdir á bátnum til hlítar en ljóst er að öxull, hæll og stýri eru ónýt, sagði Sæmundur, sem á tæpa viku eftir af grásleppuvertíðinni en hann byrjaði 20. mars.

• Blogga um frétt