Fengsæll fiskimaður í 70 ár

Robert T. Kristjanson, fiskimaður á Gimli, hefur stigið ölduna í 70 ár. Um helgina var greint frá því að 12. júlí næstkomandi fær hann æðstu viðurkenningu sem veitt er í Manitoba, Manitobaorðuna (the Order of Manitoba), fyrir ævistarfið á Winnipegvatni og fyrir að hafa staðið vörð um mikilvægi fiskveiða sem helsti talsmaður fiskimanna á svæðinu í áratugi.

„Hann á þetta skilið,“ segir lífsförunauturinn Sigurrós, sem hefur staðið við hlið eiginmannsins í stríðu sem blíðu. Enginn, sem til þekkir, efast um orð hennar og viðurkenningar honum til handa eru til vitnis um það.

Á 79 ára afmæli hans, 2012, var hann til dæmis sæmdur afmælisorðu Elísabetar II. Englandsdrottningar (The Queen's Diamond Jubilee Medal) og ári síðar, á 80 ára afmælinu 7. desember, heiðraði fylkisstjórn Manitoba hann fyrir mengunarvarnir í Winnipegvatni og baráttu fyrir sjálfbærum veiðum.

Sjá umfjöllun um viðurkenningu þessa í heild á baksíðu Morgunblaðsins í dag.