Níu dagar eru nú liðnir af strandveiðitímabilinu og hefur alls 1.003 tonnum verið landað, eða fimmtungi minna en á sama tíma á síðasta ári. Töluvert færri bátar en þá eru að veiðum nú, en 352 bátar hafa landað afla saman borið við 435 báta í fyrra.

Þetta kemur fram á vef Landssambands smábátaeigenda. Segir þar að fækkun báta og minni afli sé sláandi á svæði B, eða frá Strandabyggð til Grýtubakkahrepps, en aflinn þar er innan við 40% af þeim afla sem kominn var á land í fyrra á sama tíma.

Á svæði D sé hins vegar betri þátttaka í veiðunum; 90 bátar byrjaðir á móti 85 í fyrra.

Bent er á að fimm bátar séu komnir með yfir sjö tonn af afla og hafa fjórir þeirra náð að róa alla níu dagana og eiga því þrjá daga eftir í þessum mánuði. Það eru Sól BA-14 með 7.176 tonn, Græðir BA-29 með 7.144 tonn, Natalia NS-90 með 7.113 tonn, Jónas SH-159 með 7.111 tonn og loks Kolga BA-70 með 7.031 tonn.

Tengdar fréttir

Smábátaveiðar

Ánægður með nýja Sigrúnu Björk ÞH

• Lokun Skápsins tvímælalaust að skila sér
• „Leggjum línuna hvenær sem veður leyfir“
• Náðu 10 tonnum í mokveiði
• Fordæma vinnubrögð og mótmæla tillögum

» Fleiri tengdar fréttir

• Blogga um frétt