Aflamet hjá Eyjunum

Aldrei hafa skip útgerðarfélagsins Bergs-Hugins í Vestmannaeyjum borið jafnmikinn afla að landi í einum mánuði og í nýliðnum aprílmánuði. Alls lönduðu Vestmannaey VE og Bergey VE 1.538 tonnum af fiski í mánuðinum en hvort skip var aðeins 17 daga á sjó. Frá þessu er greint á vef Síldarvinnslunnar. 

Fyrra aflamet skipa félagsins í einum mánuði var í mars 2009 en þá voru skipin reyndar þrjú að tölu. Aflaverðmæti skipanna hefur heldur aldrei verið meira en í síðasta mánuði en það reyndist vera 338 milljónir króna. Fyrra met aflaverðmætis eins mánaðar er frá maímánuði 2010.

Heildarafli skipanna tveggja frá áramótum er 4.409 tonn og er þetta mesti afli sem skip félagsins hafa borið á land á tímabilinu janúar-apríl. Aflaverðmæti frá áramótum nálgast einn milljarð króna.

• Blogga um frétt