„Afar sáttir við veiðarnar“

„Þetta var súpermánuður hjá okkur, með þeim betri. Veiðiferðirnar voru stuttar eða um fjórir sólarhringar höfn í höfn og aflinn yfirleitt rúmlega 100 tonn í hverri ferð. Við fiskuðum allan mánuðinn á okkar hefðbundnu miðum. Við vorum í Hvalbakshallinu, á Hvalbaksgrunni og í Lónsbugtinni,“ segir Rúnar L. Gunnarsson, skipstjóri á ísfisktogaranum Gullveri NS, en veiðar skipsins hafa gengið vel að undanförnu.

Í aprílmánuði fór skipið í sex veiðiferðir og landaði samtals 642 tonnum á Seyðisfirði. Uppistaða aflans, eða 374 tonn, var þorskur en síðan landaði hann 79 tonnum af ufsa, 77 tonnum af karfa, 64 tonnum af ýsu og minna af öðrum tegundum. Rúnar segist mjög ánægður með aprílmánuð.

„Við erum afar sáttir við það hvernig veiðarnar hafa gengið, það er ekki hægt annað.“

• Blogga um frétt