Mikil hátíðarhöld voru í Vestmannaeyjum í gær við upphaf sjómannadagshelgarinnar þegar nýjum skuttogara Vinnslustöðvarinnar Breka VE var gefið nafn og hann blessaður. Breki kom til landsins í byrjun síðasta mánaðar en hann var smíðaður í skipasmíðastöðinni Huanghai í Kína. Smíðin hófst árið 2014.
Það var Kristín Gísladóttir, hluthafi í Vinnslustöðinni og fyrrverandi stjórnarmaður, sem gaf skipinu nafn. Sr. Guðmundur Örn Jónsson og Viðar Stefánsson blessuðu.
Systurskip Breka er togarinn Páll Pálsson í eigu Hraðfrystihússins Gunnvarar í Hnífsdal. Breki er fyrsta nýsmíði Vinnslustöðvarinnar í Vestmannaeyjum í 72 ára sögu félagsins.
„Árið 2007 greiddi Vinnslustöðin í Vestmannaeyjum skatt í fyrsta skipti í sögu félagsins. Fram að því var Vinnslustöðin rekin með tapi eins og allur sjávarútvegurinn. Fyrst núna hafa fyrirtækin náð þeim styrk að þau treysti sér til þess að smíða skipin sjálf,“ segir Sigurgeir Brynjar Kristgeirsson, Binni, framkvæmdastjóri Vinnslustöðvarinnar.
Hann segir stöðu Vinnslustöðvarinnar vera að versna með versnandi samkeppnishæfni en fyrirtækið hafi nýtt góðærið til að endurnýja skip og verksmiðju. Alls hefur fyrirtækið fjárfest fyrir átta milljarða króna og mikil uppbygging átt sér stað síðan 2016.
Þar má nefna nýja frystigeymslu sem var tekin í notkun síðasta haust en gefið nafn í gær, Kleifarfrost, nýtt uppsjávarhús og endurnýjun uppsjávarskipaflota VSV. Þá jók VSV við aflaheimildir með kaupum á útgerðarfélaginu Glófaxa á síðasta ári.
„Breki mun veiða aflann sem togararnir Sindri og Gullberg veiddu áður. Aflinn er þannig á við tvö skip en Breki eyðir minni olíu en annað þeirra. Það er ljóst að skipið er mjög hagkvæmt,“ segir Binni.
Binni vonast til þess að hægt verði að fara í fyrsta prufutúrinn núna í júní og að skipið verði komið í reglulegan rekstur í júlí.