Stjórnvöld hindri veiðar á landsel

Hafrannsóknastofnun leggur til að stjórnvöld leiti leiða til að koma í veg fyrir beinar veiðar á landsel og lágmarka meðafla landsela við fiskveiðar, auk þess sem skráningar á öllum selveiðum verði lögbundnar.

Bent er á að sex tegundir sela hafi fundist við Ísland en einungis tvær tegundir, landselur og útselur, kæpi hér við land að staðaldri.

Stofnstærðir tegundanna tveggja hafi þá farið stöðugt minnkandi frá áttunda og níunda áratug síðustu aldar; landselum fækkað úr 33 þúsund dýrum árið 1980 í um 7.700 dýr árið 2016 eða um 77%, og útselum fækkað úr níu þúsund dýrum árið 1982 í 4.200 dýr árið 2012.

Langreyðum og hnúfubökum fjölgað undanfarna áratugi

Í skýrslu stofnunarinnar er enn fremur greint frá því að hrefnum hafi fækkað mikið á íslenska landgrunninu undanfarin ár, líkast til vegna breyttrar útbreiðslu mikilvægra fæðutegunda á borð við síli og loðnu. Vísað er til hvalatalninga sem framkvæmdar hafa verið með reglulegu millibili árin 1987 til 2016, sem sýni mikinn breytileika í fjölda hvala.

Stofnstærð langreyða og hnúfubaka hafi samkvæmt þeim farið vaxandi undanfarna tvo til þrjá áratugi og var fjöldi langreyða árið 2015 sá mesti síðan talningar hófust.