Ýsa, þorskur og ufsi styrkjast enn

Ufsahausar Hrygningarstofn ufsa er nú metinn í sögulegu hámarki enda ...
Ufsahausar Hrygningarstofn ufsa er nú metinn í sögulegu hámarki enda hefur nýliðun síðasta áratugar verið góð mbl.is/Eggert

Hafrannsóknastofnun leggur til að aflamark þorskveiða verði aukið um 3% á næsta fiskveiðiári, 2018/2019, í samræmi við aflareglu stjórnvalda. Þar með fari þorskkvótinn úr 257,6 þúsund tonnum á yfirstandandi fiskveiðiári í 264,4 þúsund tonn.

Hrygningarstofn þorsksins hefur stækkað á undanförnum árum og ekki verið stærri í hálfa öld, að því er fram kom á kynningarfundi stofnunarinnar í gær, þar sem farið var yfir úttekt á ástandi nytjastofna og ráðgjöf fyrir næsta fiskveiðiár.

Þorskafli aukist síðustu ár

Greint var meðal annars frá því að veiðihlutfall þorsks hefði lækkað og stækkun stofnsins væri fyrst og fremst afleiðing minnkandi sóknar. Árgangurinn frá árinu 2013 er metinn slakur en árgangar áranna 2014 og 2015 eru nálægt langtímameðaltali.

Líklegt er talið að stærð viðmiðunarstofns næstu þrjú ár muni haldast nokkuð svipuð því sem nú er.

Bent er á að þorskafli hafi farið vaxandi undanfarin ár. Hlutdeild línu í aflanum hafi vaxið frá aldamótum en hlutdeild neta minnkað.

„Undanfarinn áratug hefur hlutfallslega mikið verið af 8 ára og eldri fiski í afla, samanborðið við árin 1973–2006. Afli á sóknareiningu hefur verið hár á undanförnum árum í helstu veiðarfæri,“ segir í skýrslu stofnunarinnar.

Stofnunin leggur þá til að aflamark ýsu verði 57.982 tonn fyrir fiskveiðiárið 2018/2019, sem er aukning um 40% frá yfirstandandi fiskveiðiári. Aukningin er sögð byggja á bættri nýliðun ýsu árin 2016 og 2017 miðað við árin fimm þar á undan.

Stofnmælingar bendi enn fremur til að hlutfall veiðistofns ýsu á norður- og austurmiðum hafi aukist úr 10–15% í tæp 50% frá 2000–2008.

Á sama tíma hafi einungis fimmtungur aflans verið veiddur þar, og því sé veiðiálag á ýsu á norðurmiðum töluvert minna en utan þeirra. Norðurmið hafi hins vegar lengi verið mikilvæg uppeldissvæði ýsu, en fyrir 2000 gekk hún þaðan við kynþroska.

Nýliðun ufsa góð síðasta áratug

Jafnframt er gert ráð fyrir 30% aukningu í aflamarki ufsa fyrir næsta fiskveiðiár, úr 60.237 tonnum í 79.092 tonn. Hrygningarstofn tegundarinnar er nú metinn í sögulegu hámarki. Veiðihlutfall hefur lækkað frá 2009 og er nú metið undir markmiði aflareglu. Nýliðun síðasta áratugar hefur verið góð og fullyrt er að aukninguna megi meðal annars rekja til hins stóra 2012 árgangs sem og árganganna frá 2013 og 2014.

Ólíka sögu er að segja af gullkarfa, en árgangar tegundarinnar hafa verið með lakasta móti frá árinu 2006 og af þeim sökum hefur hrygningarstofninn minnkað lítillega. Samkvæmt aflareglu verður heildaraflamark gullkarfa því 43.600 tonn sem er 14% lækkun frá fyrra fiskveiðiári. Samkvæmt samkomulagi milli Íslands og Grænlands munu 90% eða 39.240 tonn koma í hlut Íslendinga.

Ráðgjöf fyrir grálúðu er þá óbreytt frá fyrra ári og nemur 24.150 tonnum. Samkvæmt samkomulagi milli Íslands og Grænlands munu um 13.500 tonn koma í hlut Íslendinga.

Afurð Dags. Meðalverð
Þorskur, óslægður 17.1.19 287,17 kr/kg
Þorskur, slægður 17.1.19 332,13 kr/kg
Ýsa, óslægð 17.1.19 271,19 kr/kg
Ýsa, slægð 17.1.19 236,90 kr/kg
Ufsi, óslægður 17.1.19 100,26 kr/kg
Ufsi, slægður 17.1.19 134,00 kr/kg
Djúpkarfi 16.1.19 253,00 kr/kg
Gullkarfi 17.1.19 306,60 kr/kg
Litli karfi 24.10.18 17,00 kr/kg
Blálanga, óslægð 17.1.19 190,00 kr/kg

Fleiri tegundir »

17.1.19 Björg EA-007 Botnvarpa
Karfi / Gullkarfi 48.408 kg
Ufsi 6.841 kg
Hlýri 1.837 kg
Langa 682 kg
Blálanga 506 kg
Samtals 58.274 kg
17.1.19 Þorleifur EA-088 Þorskfisknet
Þorskur 3.287 kg
Karfi / Gullkarfi 573 kg
Ufsi 305 kg
Ýsa 96 kg
Samtals 4.261 kg
17.1.19 Litlanes ÞH-003 Línutrekt
Ýsa 408 kg
Langa 151 kg
Ufsi 15 kg
Steinbítur 14 kg
Karfi / Gullkarfi 1 kg
Samtals 589 kg

Skoða allar landanir »