Kollagen úr íslensku fiskroði

Framleiðsla er hafin á íslensku kollageni á vegum lífræknifyrirtækisins Protis, sem er í eigu FISK Seafood á Sauðárkróki.

Fyrirtækið er fyrst til að framleiða kollagen á Íslandi eftir tveggja og hálfs árs þróunarvinnu. Protis sérhæfir sig í framleiðslu fæðubótarefna sem innihalda íslensk þorskprótín sem unnin eru úr hráefni sem falla til við hefðbundna flakavinnslu á íslenskum þorski, að því er fram kemur á heimasíðu fyrirtækisins.

Í umfjöllun um mál  þetta í Morgunblaðinu í dag segir dr. Hólmfríður Sveinsdóttir, næringarfræðingur og framkvæmdastjóri Protis, eftirspurnina eftir fæðubótarefninu vera mikla hér á landi. „Kollagen er mjög heitt efni í dag vegna áhrifa á húð, hár og neglur, líka á liði, vöðva og annað.“