Ekki rétt að endurskoða hvalveiðina

Kristján Þór Júlíusson sjávarútvegs- og landbúnaðarráðherra segir stefnu Íslands í hvalveiðimálum byggjast á því að viðhalda rétti til að nýta hvalastofna við landið með sjálfbærum hætti líkt og aðrar lifandi auðlindir hafsins og telur ekki rétt að endurskoða hvalveiðistefnuna.

Þetta segir ráðherra í svari sínu við þrískiptri fyrirspurn Þorgerðar Katrínar Gunnarsdóttur, þingmanns Viðreisnar, en svarið birtist á vef Alþingis í gær.

Þorgerður Katrín spurði ráðherra hvort hann hefði kannað möguleikann á því að afturkalla leyfi Hvals hf. til langreyðaveiða í sumar í ljósi „heildarhagsmuna Íslands og lítillar eftirspurnar eftir hvalaafurðum“ og hvort hann teldi lagalegan grundvöll til slíkrar afturköllunar.

Kristján Þór telur svo ekki vera, þar sem veiðileyfum hafi þegar verið úthlutað og að erfitt væri að sýna fram á að afturköllun leyfis myndi ekki verða til tjóns fyrir Hval hf., en samkvæmt stjórnsýslulögum geta stjórnvöld afturkallað ákvarðanir af eigin frumkvæði þegar slík afturköllun verði aðilum ekki til tjóns.

Kristján Þór Júlíusson, sjávarútvegs- og landbúnaðarráðherra. mbl.is/Valli

Þá vísar Kristján Þór til álits ríkislögmanns um þetta efni frá 2016, þar sem m.a. fram kom að reglugerð nægi ekki til að banna veiðar á langreyðum almennt, heldur verði að banna þær veiðar með lögum. Það styðjist m.a. við 75. gr. stjórnarskrár Íslands, þar sem segir að lagafyrirmæli þurfi ef skerða eigi atvinnufrelsi.

Beðið eftir skýrslu um þjóðhagsleg áhrif hvalveiða

Þorgerður Katrín spurði Kristján Þór einnig að því hvort hann teldi ástæðu til að óttast að langreyðaveiðar Hvals hf. gætu haft neikvæð áhrif á viðskipti með íslenskar sjávarútvegs- og landbúnaðarvörur og hvort hann væri tilbúinn að að grípa til mótvægisaðgerða vegna hugsanlegra neikvæðra áhrifa á útflutnings íslenskra vara.

Kristján Þór vísaði í því svari til skýrslu Hagfræðistofnunar Háskóla Íslands frá 2010 um þjóðhagsleg áhrif hvalveiða, þar sem kom fram að þjóðhagslega hagkvæmt teldist að halda hvalveiðum áfram. Ráðherra hefur þó óskað eftir uppfærðri skýrslu um þetta sama efni.

„Áður en niðurstöður þessarar vinnu liggja fyrir er að mati ráðherra hvorki tímabært að draga ályktanir varðandi hugsanleg neikvæð áhrif hvalveiða á viðskipti með íslenskar sjávar- og landbúnaðarvörur né að grípa til mótvægisaðgerða,“ segir í svari Kristjáns Þór, en í maí var gefið út að ný skýrsla um þjóðhagsleg áhrif hvalveiða ætti að liggja fyrir í haust.

• 1 blogg um fréttina

Bloggað um fréttina

• Egill Jón Kristjánsson: Hæfileikar Kristjáns felast í því að gera ekki neitt.