„Nánast alveg dautt“

„Við erum úti í Rósagarði og hérna er nánast alveg dautt. Við munum skanna svæðið fram á morgundaginn og ef ekkert gerist verður haldið til hafnar. Það verður þó að hafa það í huga að nauðsynlegt er að fara út og leita, annars gerist ekki neitt,“ segir Gísli Runólfsson, skipstjóri á Bjarna Ólafssyni.

„Nú eru bara fjögur kolmunnaskip hérna á miðunum en það fimmta, Beitir, er á landleið.“

Fimm tonn á tímann „allt of lítið“

Kolmunnaveiðinni sem verið hefur á Þórsbanka og í Rósagarðinum virðist vera að ljúka að sinni, að því er fram kemur á vef Síldarvinnslunnar. Segir þar að Börkur NK hafi landað 1.700 tonnum í Neskaupstað á föstudag og Bjarni Ólafsson AK landað svipuðu magni daginn eftir.

Sturla Þórðarson, skipstjóri á Beiti, tekur undir með Gísla og segir að afar lítið sé að hafa.

„Við erum á landleið með 320 tonn. Það hefur verið ákveðið að hvíla þetta um sinn. Aflinn hefur verið um það bil fimm tonn á tímann og það er allt of lítið,“ segir Sturla.

• Blogga um frétt