Aflinn 11% minni en í fyrra

Fiskafli íslenskra skipa í júní var 47.227 tonn eða 11% minni en í júní 2017. Botnfiskafli var rúm 32 þúsund tonn og dróst saman um tvö prósent, þar af nam þorskaflinn tæpum 18 þúsund tonnum sem er 2% minni afli en í júní 2017.

Þetta kemur fram í frétt Hagstofu Íslands.

Af uppsjávartegundum veiddist nær eingöngu kolmunni, en af honum veiddust tæplega 11 þúsund tonn sem er 31% minna en í júní 2017. Skel- og krabbadýraafli nam 735 tonnum en var 742 tonn í júní 2017.

Heildarafli á 12 mánaða tímabili, frá júlí 2017 til júní 2018, var tæplega 1.266 þúsund tonn, en það er 8% samdráttur miðað við sama tímabil ári fyrr.

Verðmæti afla í júní metið á föstu verðlagi var 6% minna en í júní 2017.

• Blogga um frétt