600 tonna afli hjá Venusi NS

Venus NS, skip HB Granda, vinnur að löndun á rúmum 600 tonnum af makríl á Vopnafirði. Er það öllu minni afli en veiddist fyrir viku, en þá var makrílaflinn upp á 750 tonn. Fengust tonninn 600 hjá Venusi í fimm hollum og er fiskurinn af sömu stærðargráðu og áður, eða á bilinu 420-440 grömm.

„Það var svona blettótt veiði og minna að sjá,“ sagði Kristján Þorvarðarson, skipstjóri á Venusi NS, í samtali við blaðamann Morgunblaðsins í gær og var þá verið að vinna að löndun. Aðspurður segir Kristján að fiskurinn virðist vera að færast austur með kantinum.

Jóna Eðvalds SF, skip Skinneyjar-Þinganess, kom að höfn í gærnótt með 550 tonn af makríl, sem fékkst í tveimur hollum, sagði Sigurður Bjarnason, skipstjóri á Jónu Eðvalds SF, í samtali við Morgunblaðið í gærkvöldi. Þetta var annar túr skipsins á makrílveiðunum í sumar, en í fyrsta túr fengust 600 tonn. Stefnir skipið aftur út á miðin síðdegis í dag, segir Sigurður aðspurður.

Í gær var Ásgrímur Halldórsson SF, skip Skinneyjar-Þinganess, við veiðar suðaustur af landinu og Kap VE, skip Vinnslustöðvarinnar, var við veiðar sunnan Vestmannaeyja. Þá stefndi Hoffell SU, Loðnuvinnslunni, að heimahöfn á Fáskrúðsfirði.