Verðmæti aflans jókst um 33%

Verðmæti sjávarafla íslenskra skipa í apríl nam tæpum 11,4 milljörðum króna, en um er að ræða tæplega 33% aukningu í samanburði við sama mánuð á síðasta ári.

Fram kemur í tilkynningu á vef Hagstofunnar að verðmæti botnfiskaflans hafi verið um 8,3 milljarðar króna og þar af var verðmæti þorskaflans rúmir 4,5 milljarðar. Aflaverðmæti uppsjávartegunda var tæpir 2 milljarðar króna og var að langmestu leyti fyrir kolmunna.

Verðmæti flatfiskafla nam tæplega 773 milljónum króna og verðmæti skelfiskafla var 348 milljónir króna.

Á tólf mánaða tímabilinu frá maí 2017 til apríl 2018 nam aflaverðmæti úr sjó tæplega 122 milljörðum króna, eða fimm prósentustigum hærra en á sama tímabili árið áður.

• Blogga um frétt