Í nýju skipi Hafrannsóknastofnunar má reikna með að allur aðbúnaður áhafnar og rannsóknafólks verði betri. Rannsóknaskipin þurfa að rúma stóra áhöfn og segir Sigurður Guðjónsson, forstjóri Hafró, að í stærstu leiðöngrum Hafró geti verið allt að 40 manns um borð.
„Rannsóknarbúnaði og starfsfólki er skipt út eftir því hvað er verið að skoða hverju sinni. Í hefðbundnum hafrannsóknum eru gerðar efnafræðilegar mælingar, s.s. á seltu, og greiningar á plöntu- og dýrasvifi undir smásjá, en þegar komið er í rannsóknir á sjálfum fiskinum færist vinnan niður í lest og vinnuskilyrðin verða blautari.“
Rannsóknaskipið Bjarni Sæmundsson RE var smíðað fyrir hálfri öld í Þýskalandi. Aldurinn er farinn að segja til sín og kominn tími til að leggja Bjarna.
mbl.is/Þorgeir
Hefð skapast við val á nöfnum
Þá á eftir að finna nafn á nýja skipið. Sigurður segir það ekki endilega vera reglu, en að skipin tvö sem stofnunin notar í dag heiti eftir íslenskum náttúrufræðingum og hafi svipuð hefð skapast við val á nöfnum hafrannsóknaskipa í nágrannalöndunum.
„Bjarni Sæmundsson var merkilegur náttúrufræðingur, kenndi lengi við Menntaskólann í Reykjavík og var frumkvöðull á sviði fiskirannsókna á Íslandsmiðum. Árni Friðriksson var síðan einn af fyrstu fiskifræðingum landsins, og var m.a. forstöðumaður Fiskideildar Atvinnudeildar Háskólans, forvera Hafrannsóknastofnunar,“ útskýrir Sigurður, sem fæst ekki til að leggja til eitt nafn umfram önnur.
„Aðallega skipað karldunkum“
„Það væri vissulega gaman að fá kvenmann til sögunnar en það gæti orðið erfitt því eins og þjóðfélagið var þegar hafrannsóknir voru að hefjast hér á landi var þetta fræðasvið aðallega skipað karldunkum,“ segir hann.
„Það hefur verið rætt hér innanhúss, bæði í gamni og alvöru, hvort efna ætti til samkeppni um nafn á nýja skipið en eins og dæmin sanna geta menn stundum lent í ógöngum með þennig keppnir og er skemmst að minnast þess þegar almenningur vildi gefa breska vísindaskipinu RRS Sir David Attenborough nafnið Boaty McBoatface.“