Veiðir á við tvo en eyðir minna en einn

Breki, nýr ísfisktogari Vinnslustöðvarinnar, gerir gott betur en að uppfylla væntingar Vinnslustöðvarinnar eftir fyrstu veiðiferðirnar, segir í tilkynningu á vef VSV. Breki afkastar á við báða togarana sem hann leysti af hólmi hjá Vinnslustöðinni en brennir þriðjungi minni olíu en hvor togaranna um sig hefði gert við veiðarnar.

„Og jafnvel gott betur,“ segir í fréttatilkynningu Vinnslustöðvarinnar. „Og það þótt Breki dragi tvö troll í einu,“ segir þar enn fremur. Haft er eftir Magnúsi Ríkharðssyni, skipstjóra Breka, í fréttatilkynningunni að olíueyðsla skipsins sé minni en hann bjóst við en Magnús stóð vaktina í brúnni í gær og var skipið á leið til Vestmannaeyja með hátt í fullfermi, 400 kör af þorski, karfa og ufsa, þegar Vinnslustöðin birti tilkynninguna á vef sínum.

Binni, framkvæmdastjóri Vinnslustöðvarinna, tekur á móti Breka í byrjun júní. mbl.is

„Skrúfurnar á systurskipunum Breka og Páli Pálssyni ÍS eru þær stærstu í íslenska fiskiskipaflotanum, hannaðar af Sævari Birgissyni í Skipasýn. Í skrúfustærðinni liggur olíuhundurinn grafinn,“ segir í tilkynningunni en á hönnunarskeiði Breka og Páls var talað um að með því að stækka skrúfur þeirra og hægja á þeim  mætti fá meira afl með minni orku. 

„Reynslan í fyrstu veiðiferðum Breka staðfestir að forsögn skrúfuhönnuðarins stenst fullkomlega. Orkunýtingin er jafnvel enn betri en við þorðum að vona,“ segir Guðni I. Guðnason, umsjónarmaður skiparekstrar og fasteigna Vinnslustöðvarinnar.

Sjá á vef Vinnslustöðvarinnar

• Blogga um frétt