Hafa fundið makríl í Smugunni

Bjarni Ólafsson AK stefnir nú hraðbyri í Smuguna en þar hefur verið nokkur makrílveiði síðustu daga, á sama tíma og rólegt hefur verið yfir makrílveiðunum við Íslandsstrendur.

Hafa skip leitað fyrir vestan og austan land með litlum árangri þótt töluvert af síld hafi fundist austur af landinu í vikunni. Þannig kom Beitir NK með um 300 tonn af síld til löndunar í Neskaupstað í gær, að því er fram kemur á vef Síldarvinnslunnar.

Börkur NK kom einnig með makríl- og síldarfarm til Neskaupstaðar af Austfjarðamiðum á mánudag og Bjarni Ólafsson AK kom með makríl að vestan á miðvikudag. Þá landaði Vilhelm Þorsteinsson EA í gær frystum makríl í frystigeymslur Síldarvinnslunnar.

Börkur hóf svo veiðar í Smugunni í morgun en þangað stefnir Bjarni Ólafsson, eins og áður sagði.

• Blogga um frétt