„Fréttin strax orðin gömul“

„Makríllinn er sprettharður fiskur og það getur verið mikil fart á honum. Í túrnum eltum við hann í yfir 100 mílur á einungis tveimur sólarhringum. Hann fer svo hratt yfir að þegar fréttist af makríl einhvers staðar er fréttin strax orðin gömul því það er engin vissa fyrir því að finna makríl þegar komið er á staðinn.“

Þetta segir Hálfdan Hálfdanarson, skipstjóri á Berki NK, sem er nú að landa 800 tonnum af makríl í Neskaupstað. Aflann fékk skipið í Smugunni og fer hann allur til vinnslu í fiskiðjuveri Síldarvinnslunnar, að því er fram kemur á vef útgerðarinnar.

Hálfdan segir að mikil ferð sé á fiskinum og því þurfi stundum að gefa sér góðan tíma til leitar.

„Við fengum aflann í fimm holum og besta holið gaf 260 tonn og þá var togað í rúman klukkutíma. Fiskurinn er frekar stór og ekki mikil áta í honum. Það bendir allt til þess að makrílgöngurnar séu miklu seinna á ferðinni nú en síðustu ár og því hefur vertíðin ekki farið af stað af miklum krafti. Ég hef hins vegar fulla trú á að menn nái að veiða kvótann,“ segir Hálfdan. 

Bjarni Ólafsson AK er væntanlegur til Neskaupstaðar í fyrramálið með 770 tonn sem einnig fengust í Smugunni og Beitir NK er þar að veiðum. Segir á vef útgerðarinnar að einnig hafi frést af makrílafla fyrir vestan land og vart hafi orðið við makríl suðaustur af landinu síðustu daga.

• Blogga um frétt