Strandveiðum að ljúka

Nú eru fjórir veiðidagar eftir af strandveiðum sumarsins, sem lýkur 30. ágúst. Samtals hafa 547 bátar landað afla, en þeir voru 594 á vertíðinni í fyrra. Alls er búið að landa 9.400 tonnum sem er 92,2% af 10.200 tonna viðmiðun. Heimilt er að róa 12 daga í mánuði frá mánudegi til fimmtudags og í hverri veiðiferð er heimilt að draga 650 kíló, í þorskígildum talið, af kvótabundnum tegundum, að ufsa undanskildum.

Grímur AK er aflahæstur strandveiðibáta á vertíðinni með 46,5 tonn í 44 róðrum. Flestir bátar hafa róið á svæði A frá Arnarstapa í Súðavík og þar er heildaraflinn orðinn 3.700 tonn. Þar hefur hver bátur landað að meðaltali tæplega 21 tonni.

Á heimasíðu Landssambands smábátaeigenda kemur fram að á yfirstandandi tímabili hafi tíðarfarið verið strandveiðimönnum afar erfitt. Þá segir þar að meðalverð á mörkuðum hafi verið um 16% hærra í ár en það var í fyrra og hafi verðið hækkað enn frekar í ágústmánuði.