Norðurleiðin fær vegna loftslagsbreytinga

Glænýtt ísstyrkt flutningaskip er á leiðinni í sögubækur hafsins fyrir að vera fyrsta flutningaskipið sem fer norðurleiðina frá Rússlandi, í gegnum Asíu og til Evrópu.

Flutningaskipið, Venta Maersk, er í eigu flutningafyrirtækisins Seago Line, sem er hluti af danska flutningarisanum A.P. Moller-Maersk.

Einn helsti sérfræðingur í norðaustur-siglingaleiðinni, prófessor Frederic Lasserre, sem starfar við Laval-háskólann í Quebec í Kanada, segir í samtali við EUobserver að flutningafyrirtæki horfi í auknum mæli til norðaustur-leiðarinnar þegar kemur að vöruflutningum.

Ekki er langt síðan norðaustur-leiðin var alfarið ófær flutningaskipum en á síðustu tveimur til þremur árum hafa áhrif loftslagsbreytinga, það er bráðnun hafíss, gert það að verkum að siglingaleiðin er orðin möguleg fyrir stór flutningaskip sem rúmast nú á leiðinni.

Leiðin frá norðurhluta Asíu til Evrópu, norður af Rússlandi, er töluvert styttri en leiðin suður af Indlandi og í gegnum Suez-skurðinn. Norðaustur-leiðin getur stytt flutningsleið skipa sem fara frá Evrópu til norðurhluta Kína, Japan eða Suður-Kóreu um allt að 40%.

Venta Maersk fór frá austurströnd Rússlands 1. september og er fyrsta stopp í Evrópu áætlað í Bremerhaven í Þýskalandi síðar í mánuðinum. Skipið er eitt af sjö ísstyrktum flutningaskipum sem Maersk hefur látið smíða í Kína. Skipin eru 200 metrar á lengd, 35,2 metrar á breidd og er flutningsgeta þeirra 3.600 gámar, sem hver er sex metrar að lengd.

Enginn innan A.P. Moller-Maersk-samsteypunnar hefur viljað tjá sig um þessi tímamót enn sem komið er. Í yfirlýsingu frá fyrirtækinu segir einfaldlega að að siglingaleiðin sé notuð í tilraunaskyni og til að afla upplýsinga.

• Blogga um frétt