Bendir á tengsl Fréttablaðsins og VSV
Setja bókamerki
Stjórnarformaður Fréttablaðsins er einnig lögmaður meirihlutaeigenda Vinnslustöðvarinnar í Vestmannaeyjum hf. og sömuleiðis varaformaður stjórnar fyrirtækisins. Þetta segir Guðmundur Kristjánsson, forstjóri HB Granda og eigandi Brims.
Í tilkynningu frá Guðmundi, sem send er út í tilefni fréttar Fréttablaðsins um athugun Samkeppniseftirlitsins á kaupum Brims hf. á hlutabréfum í HB Granda hf., segir hann að eftirlitið hafi haft kaupin í athugun og hafi sent félögunum erindi þess efnis í júlí.
„Þar kemur fram að Samkeppniseftirlitið skoðar fjögur atriði. Í fyrsta lagi hvort tilkynningarskyldur samruni hafi átt sér stað þegar Brim hf. eignaðist þann 4. maí 34% hlut í HB Granda. Það er enn í skoðun,“ segir í tilkynningu Guðmundar.
„Í öðru lagi hvort það standist 10. gr. samkeppnislaga að aðaleigandi Brims hf. sé forstjóri HB Granda. Það er enn í skoðun.
Í þriðja lagi hvort stjórnarseta aðaleiganda Brims hf. í stjórn Vinnslustöðvarinnar brjóti gegn 10. gr. samkeppnislaga. Það er rangt að Guðmundur Kristjánsson hafi í vor verið í stjórn Vinnslustöðvarinnar og þarfnast því ekki frekari skoðunar.“
Bent er á að í fjórða lagi sé athugað hvort tilkynningaskyldur samruni hafi átt sér stað þegar Brim hf. keypti allt hlutafé í Ögurvík árið 2016.
„Samskipti áttu sér stað við Samkeppniseftirlitið á þeim tíma og var það sameiginleg niðurstaða þá að þessi viðskipti væru ekki tilkynningarskyld og er það atriði ekki lengur til skoðunar. Mál þetta var til umfjöllunar í fjölmiðlum í byrjun júlí á þessu ári og þá sagði Guðmundur í viðtali við Morgunblaðið að eðlilegt væri að eftirlitsstofnanir væru að fylgjast með viðskiptalífinu og er hann enn þeirrar skoðunar,“ segir í tilkynningunni.
Að lokum segir að vegna umræddrar forsíðufréttar Fréttablaðsins megi geta þess, að stjórnarformaður Fréttablaðsins sé einnig lögmaður meirihlutaeigenda Vinnslustöðvarinnar í Vestmannaeyjum hf. og varaformaður stjórnar fyrirtækisins, en maðurinn sem um ræðir er Einar Þór Sverrisson.
Nauðgaði kærustu sinni og tók það upp
Mun fara sparlega með málskotsréttinn
29 nautgripir fundust dauðir
Gerir ráð fyrir 150 samningum í næstu viku
Aðkoman í gripahúsið mjög slæm
Hæstiréttur staðfestir vanhæfi alls Landsréttar
Hyggjast leyfa fólki að skoða gosið
Segjast hafa skotið niður langdræga sprengjuvél