Makrílaflinn á vertíðinni er kominn yfir 110 þúsund tonn en heildarkvóti ársins er 146 þúsund tonn. Farið er að síga á seinni hluta vertíðar og flestar útgerðir uppsjávarskipa nálgast þau mörk að mega flytja það sem er óveitt af aflaheimildum yfir á næsta ár en heimilt er að flytja 10% á milli ára.
Uppsjávarskipin hafa síðustu daga verið austarlega í Síldarsmugunni, nálægt norsku lögsögumörkunum. Góður afli fékkst þar í fyrradag en í gærmorgun voru skipin að leita.
Á heimasíðu Síldarvinnslunnar í Neskaupstað lýsir Hjörvar Hjálmarsson, skipstjóri á Berki, makrílvertíð sumarsins á eftirfarandi hátt: „Í fyrsta lagi byrjuðum við veiðarnar seinna en undanfarin ár og í öðru lagi virðist hafa verið minna af makríl hér við landið. Ástæða þess að makríllinn stoppaði lítið við landið er án efa sú að það var minna um átu hérna en verið hefur undanfarin ár.
Veiðarnar þróuðust síðan þannig að þær fóru að miklu leyti fram í Síldarsmugunni en veiðin var misjöfn frá einum tíma til annars. Stundum gekk vel að veiða en stundum þurfti líka að leita töluvert að fiskinum sem gat verið tímafrekt.“
Smátt og smátt hefur dregið úr makrílveiði smábáta við Keflavík, Snæfellsnes og í Steingrímsfirði. Enginn afli hefur borist á land síðustu vikuna. Alls hafa smábátar landað 3.752 tonnum í ár sem er þúsund tonnum minni afli en á sama tíma í fyrra.
Stór og falleg síld
Í vikunni byrjaði Bjarni Ólafsson AK á veiðum á norsk-íslenskri síld fyrir austan land. Skipið kom til Neskaupstaðar með 460 tonn af síld í fyrradag. Aflinn fékkst í tveimur holum í Seyðisfjarðardýpi og segir Gísli Runólfsson skipstjóri í samtali á heimasíðu Síldarvinnslunnar að síldin hafi verið stór og falleg. Á landleiðinni hafi þeir séð töluvert af síld 6-8 mílur út af Norðfjarðarhorni.