Um 750 þúsund laxar drápust á fáeinum klukkustundum í eldiskvíum fyrirtækisins Bakkafrosts í síðustu viku. Þetta kemur fram í tilkynningu frá fyrirtækinu, en greint er frá henni á vef Kringvarps Færeyja. Ekki er vitað hvers vegna fiskurinn drapst.

Talið er að þörungablómi hafi mögulega átt hlut að máli, en í tilkynningunni segir að vart hafi orðið við nokkrar þörungategundir í sjónum umhverfis kvíarnar á fimmtudaginn síðasta, það er af gerðinni phaeocystis, pseudo-nitzcia og heterosigma.

Þá segir einnig að vitað sé af miklu magni mykju, sem dreift hafi verið á tún í grennd við eldið, og að hluti hennar hafi farið í sjóinn aðeins tvö hundruð metra frá kvíunum.

Fiskurinn var að meðaltali 500 grömm að þyngd og var settur í kvíarnar við Kolbanagjógv í júní, júlí og ágúst.

Eldi hefur verið stundað á staðnum undanfarin þrjátíu ár og er atvikið án fordæma þar. Þá hefur Bakkafrost ekki vitneskju um svipuð atvik í öðrum eldiskvíum síðustu daga.

Hreinsunarstarfi á að ljúka í dag og bendir fyrirtækið að lokum á að fiskurinn hafi verið tryggður.

Tengdar fréttir

Fiskeldi

Fjárfestingin 115 milljarðar króna

• Bátur Arnarlax verður fyrsti sinnar tegundar
• Lagareldismálið fyrst á dagskrá
• Gera niðurstöður umhverfisvaktana aðgengilegar
• Gagnrýna aðferðir við áhættumat

» Fleiri tengdar fréttir

• Blogga um frétt