Hátæknifyrirtækið Valka hefur ráðið til starfa þrjá nýja stjórnendur, að því er fram kemur í tilkynningu frá fyrirtækinu.
Auður Ýr Sveinsdóttir hefur verið ráðin aðstoðarframkvæmdastjóri Völku, en hún hefur undanfarin tvö ár stýrt rekstrarsviði fyrirtækisins. Í tilkynningunni segir að Auður Ýr hafi víðtæka reynslu úr hinu alþjóðlega viðskiptaumhverfi og hafi áður starfað í tíu ár sem yfirmaður gæðastjórnunar, til að mynda við straumlínustjórnun og innri samskipti hjá álveri Rio Tinto í Straumsvík.
Enn fremur hafi hún starfað fyrir evrópska gæðastjórnunarfélagið EFQM til margra ára, auk þess sem hún sitji í stjórn Kvenna í sjávarútvegi og Norsk-íslenska viðskiptaráðsins.
„Sem aðstoðarframkvæmdastjóri mun Auður leiða daglegan rekstur Völku og halda utan um mannauðsmál, stefnumótun og gæða- og öryggismál,“ segir í tilkynningunni. Auður er með B.Sc.-gráðu í sjávarvísindum frá Coastal Carolina University og M.Sc. í umhverfisefnafræði frá University of Maryland í Bandaríkjunum.
Egill Sveinbjörn Egilsson hefur verið ráðinn í starf vörustjóra vél- og hugbúnaðar. Hann mun hafa lengst af starfað við vöruþróun hjá Össuri á alþjóðlegum vettvangi, eða allt frá árinu 2001, og leitt þar verkefni og teymi. Fram kemur að Egill hafi setið í framkvæmdastjórn rannsóknar- og þróunardeildar Össurar og eigi þátt í fjölmörgum einkaleyfum sem liggja að baki vörulínum fyrirtækisins. Hann hafi þá komið að stofnun Hönnunarmiðstöðvar Íslands árið 2007, tekið virkan þátt í uppbyggingunni, setið þar í stjórn og verið formaður hennar á árunum 2014 til 2016.
Egill er sagður hafa komið að fjölmörgum verkefnum og nefndarstörfum er viðkemur hönnun á Íslandi, setið í stjórn Félags vöru- og iðnhönnuða og gegnt þar formennsku. Einnig hafi hann starfað um árabil í fagráði Tækniþróunarsjóðs og kennt við Listaháskóla Íslands. Egill útskrifaðist með BA-gráðu frá Design Academy Eindhoven í Hollandi árið 2001 og MBA frá Háskóla Íslands árið 2010.
Guðjón Ingi Guðjónsson hefur þá verið ráðinn svæðissölustjóri fyrirtækisins, en hann mun hafa víðtæka reynslu úr sjávarútvegi og hafa lengst af unnið að framleiðslu-, sölu- og markaðsmálum. Hann hafi starfað um árabil sem innkaupa- og sölustjóri hjá Sölusambandi íslenskra fiskframleiðenda og að gæða- og framleiðslumálum hjá Nord-Morue, dótturfélagi SÍF í Frakklandi.
Hann hafi þá áður verið framkvæmdastjóri útflutningsfyrirtækisins Sirius og sölustjóri hjá bæði Bacco Seaproducts og Sæporti. Guðjón er menntaður útvegstæknir frá Tækniskóla Íslands og tækniteiknari frá Iðnskólanum á Akureyri.