Á grálúðu við Langanes

„Grálúðan er alveg að gera sig,“ segir Smári Rúnar Hjálmtýsson, stýrimaður á Önnu EA 205. Skipið sem er í eigu ÚA var eftir hádegi í dag um 45 sjómílur NA af Langanesi, en á dýpinu þar hefur verið ágæt grálúðuveiði að undanförnu. 

Þangað færðu Önnumenn sig nú undir haustið eftir að hafa verið djúpt út af Vestfjörðum frá því í vor. Samanlagður grálúðuafli þeirra frá í vor til loka fiskveiðiársins 31. ágúst var um 1.400 tonn. Grálúðan er veidd í net og sem stendur eru tveir bátar auk Önnu í þessari sókn; Kristrún RE og Kap II VE.  

Landað verður úr Önnu í Neskaupstað í fyrramálið og gerir Smári ráð fyrir að aflinn sem er ísaður um borð verði nærri 60 tonnum. Fer hann í vinnslu, á markað og eitthvað er flutt beint úr. „Við erum fimm til sex sólarhringa í hverjum túr og þetta gengur vel. Framan af þessum túr var svolítil bræla en nú er komið fínt veður. Við sjálfsagt förum að stíma í land upp úr miðnætti í kvöld,“ segir Smári.

Alls átján manns eru í áhöfn á Önnu og ganga níu menn til skiptis átta tíma vaktir. 

• Blogga um frétt