„Við erum kátir með veiðarnar“

„Það er haustbragur á veiðum skipanna og það hefur aflast vel. Vestmannaey landaði fullfermi á Seyðisfirði í gær og var uppistaða aflans þorskur og ýsa. Vestmannaey hóf veiðar í túrnum út af Suðausturlandi en færði sig svo á Austfjarðamið,“ segir Arnar Richardsson, rekstrarstjóri Bergs-Hugins.

Bergur-Huginn er dótturfélag Síldarvinnslunnar í Vestmannaeyjum og gerir út togarana Vestmannaey og Bergey. Fram kemur á vef Síldavinnslunnar að eins og undanfarin ár hafi skipin lagt stund á veiðar úti fyrir Suðausturlandi og Austfjörðum á þessum árstíma.

Aflanum sé svo ýmist landað fyrir austan eða í Eyjum. Arnar segir að veiðarnar hafi gengið vel síðustu vikurnar. 

„Bergey er á miðunum út af Suðausturlandinu og er að veiða ýsu, kola og ufsa. Gert er ráð fyrir að hún landi í Vestmannaeyjum á morgun. Við erum kátir með veiðarnar og verðin hafa verið að þokast upp á við.“

• Blogga um frétt