Rúmlega 40% minni aflaheimildir í makríl

Alþjóðahafrannsóknaráðið hefur ákveðið endanlega ráðgjöf sína um aflaheimildir ársins 2019 fyrir kolmunna og makríl. Leggur ráðið til að afli komandi árs verði ekki meiri en 318 þúsund tonn. Ráðgjöf yfirstandandi árs nam 551 þúsund tonnum og er því um að ræða rúmlega 40% samdrátt á ráðlögðum aflaheimildum.

Fram kemur á vef Hafrannsóknastofnunar að áætlaður heildarafli makríls í ár nemi ríflega einni milljón tonna.

Hvað kolmunna varðar leggur ráðið til að afli komandi árs verði ekki meiri en 1,14 milljónir tonna. Ráðgjöf fyrir yfirstandandi ár hljóðaði upp á 1,39 milljónir tonna og er því um lækkun að ræða, en gert er ráð fyrir að afli þessa árs verði um 1,7 milljónir tonna.

Að öllu jöfnu eru á sama tíma veitt ráð um afla næsta árs í norsk-íslenskri síld, en þar sem unnið er að endurskoðun aflareglu í síld mun ICES ekki veita ráð um hámarksafla fyrr en 23. október næstkomandi.

Upplýsingar um ráðgjöfina og forsendur hennar má nálgast hér og frekari upplýsingar í tækniskýrslu sérfræðinganefndar ICES.

• Blogga um frétt