Beiðni Arctic Fish og Arnarlax um tímabundna undanþágu frá kröfu um starfsleyfi er enn í vinnslu í umhverfisráðuneytinu. Leyfismál fyrirtækjanna vegna eldis í Patreks- og Tálknafirði eru því ekki komin í lag þrátt fyrir að sjávarútvegsráðherra hafi veitt þeim rekstrarleyfi til bráðabirgða til 10 mánaða.

Úrskurðarnefnd umhverfis- og auðlindamála felldi úr gildi starfs- og rekstrarleyfi Matvælastofnunar og Umhverfisstofnunar fyrir rúmum mánuði vegna ófullnægjandi umhverfismats. Starfsleyfi er forsenda rekstrarleyfis og er málið því í sömu stöðu og áður.

Arctic Fish og Arnarlax sóttu um bráðabirgðaleyfin strax daginn eftir að Alþingi heimilaði sjávarútvegsráðherra að veita fiskeldisfyrirtækjum rekstrarleyfi til bráðabirgða en umhverfisráðherra hafði fyrir hliðstæða heimild gagnvart starfsleyfum.

Lýkur eins fljótt og auðið er

Heimild umhverfisráðherra er að finna í lögum um hollustuhætti. Þar segir að ef ríkar ástæður mæla með því og að fenginni umsögn Umhverfisstofnunar og eftir atvikum heilbrigðisnefndar sé ráðherra heimilt að veita slíka undanþágu.

Samkvæmt upplýsingum umhverfisráðuneytisins er beiðni fyrirtækjanna í vinnslu og unnið að því að ljúka henni eins fljótt og auðið er.

Tengdar fréttir

Fiskeldi

„Margt hefur nú ekki beinlínis verið til fyrirmyndar“

• Segir nýtt frumvarp gefa eldisfyrirtækjum auðlindir
• Laxey fær sex milljarða
• Fjárfestingin 115 milljarðar króna
• Bátur Arnarlax verður fyrsti sinnar tegundar

» Fleiri tengdar fréttir