Hafrannsóknastofnun leitar að togara

Ríkiskaup, fyrir hönd Hafrannsóknastofnunar, hafa óskað eftir tilboðum í leigu á togara til að mæla stofna botnfiska á Íslandsmiðum. Að þessu sinni er óskað eftir einum togara á norðausturhorni landsins, en gert er ráð fyrir að leigan muni standa yfir í þrjár vikur í komandi marsmánuði.

Á vef Hafrannsóknastofnunar er bent á að rannsóknin sé mjög mikilvæg, með þátttöku rannsóknaskipa og tveggja togara. Svonefndir Japanstogarar hafi lengst af verið notaðir í verkefninu.

Vakin er þá athygli á að bjóða megi alla togara af ákveðinni stærð og að skilyrðin hafi verið rýmkuð frá fyrri útboðum. Flestir þeirra togara sem tekið hafi þátt í verkefninu hingað til hafi verið seldir úr landi og því mikilvægt að fá ný skip í verkefnið.

Útgerðir togara eru um leið hvattar til að kynna sér útboðsgögnin.

• Blogga um frétt