„Haugabræla“ á færeysku miðunum

„Þetta var barningur en þó lentum við í smá hrotu þar sem hægt var að hífa tvisvar á dag. Verst að það var haugabræla þessa sömu daga en það tjáði ekkert að hugsa um það.“ Þetta segir Albert Sveinsson, skipstjóri á Víkingi AK, sem kom til hafnar á Vopnafirði um miðnætti í nótt með um 1.800 tonn af kolmunna.

Albert segir fiskinn feitan og fallegan, en hann fékkst sunnarlega í færeyskri lögsögu.

Kolmunninn á svæðinu er á suðurleið til hrygningar eftir að hafa verið á ætisslóð í norðurhöfum í sumar, að því er fram kemur á vef HB Granda. Albert segir að reynslan sýni að veiðin geti glæðst upp úr þessu.

„Það var töluvert af skipum komið á svæðið og þeim fer fjölgandi. Nokkur íslensk skip voru þarna að veiðum en annars voru skipin frá ýmsum þjóðríkjum.“

• Blogga um frétt