Veiðum á íslenskri sumargotssíld lokið

Beitir NK kom til Neskaupstaðar í gærmorgun með 2.100 tonn af íslenskri sumargotssíld. Þá er Börkur NK á leið til Neskaupstaðar með 1.450 tonn. Þar með hafa Síldarvinnsluskipin lokið veiðum á íslenskri sumargotssíld á þessari vertíð.

Tómas Kárason, skipstjóri á Beiti, segir að þessi síðasta veiðiferð hafi verið heldur löng vegna veðurs, að því er segir á vef Síldarvinnslunnar.

„Veiðiferðin tók eina sex daga en við vorum bara um þrjá sólarhringa að veiðum. Það gerði tvisvar bölvaða brælu og þá var legið undir Reykjanesi og í höfn í Reykjavík. Veiðarnar fóru fram utarlega í Faxadýpinu og undir lokin urðum við varir við töluverða síld,“ segir Tómas á vef SVN.

Þá segir, að að kolmunnaveiði sé næst á dagskrá hjá Beiti og Berki. Bjarni Ólafsson hefur þegar hafið kolmunnaveiðar og einnig Polar Amaroq.

• Blogga um frétt