Aðeins aldursforsetinn verður eftir

„Kleifaberg er ótrúlegt skip eins og sagan sýnir,“ segir Runólfur Viðar Guðmundsson, framkvæmdastjóri Útgerðarfélags Reykjavíkur.

Í upphafi þessa árs gerði ÚR út fjóra frystitogara frá Reykjavík, en í upphafi næsta árs mun félagið aðeins gera út einn slíkan, Kleifaberg RE, sem var aldursforsetinn í flota fyrirtækisins. Frystiskipum í flotanum hefur fækkað á síðustu árum.

ÚR hefur í ár selt frystitogarann Brimnes til Rússlands og í síðustu viku var 36 manna áhöfn á Guðmundi í Nesi sagt upp og skipið sett á söluskrá. Fyrirtækið hefur fengið fyrirspurnir um skipið. Fyrr í ár seldi ÚR útgerðina Ögurvík og Vigra með aflaheimildum upp á tæplega sjö þúsund þorskígildistonn til HB Granda.

Aflaheimildir Útgerðarfélags Reykjavíkur, áður Brims hf., eru um 15.600 þorskígildistonn og segir Runólfur að á næstunni verði tekin ákvörðun um hvernig staðið verði að veiðum á þeim.