Makrílkvóti tvöfalt meiri en ráðgjöf

Þrátt fyrir að Evrópusambandið, Noregur og Færeyjar hafi minnkað sameiginlegan heildarkvóta í makrílveiðum um 20% er kvótinn meira en tvöfalt meiri en Alþjóðahafrannsóknaráðið, ICES, ráðleggur.

Þá er að hluta til ótalinn sá kvóti sem Ísland, Grænland og Rússland munu væntanlega taka sér einhliða í kjölfarið. Íslendingar fengu ekki aðild að samningum strandríkjahópsins svokallaða þrátt fyrir að hafa óskað eindregið eftir því.

„Það eru vonbrigði að samningsaðilar vildu ekki taka upp raunverulegar viðræður við Ísland um skiptingu veiðiheimilda sem hefðu getað orðið til þess að við yrðum aðilar að strandríkjasamningi um stjórnun makrílveiðanna,“ segir Kristján Þór Júlíusson sjávarútvegsráðherra.

Samningar ESB, Noregs og Færeyja voru að renna út og því lagði Ísland mikla áherslu á að reyna að komast að samningaborðinu og taka þátt í samningum sem ábyrgt strandríki, eins og Stefán Ásmundsson, skrifstofustjóri í atvinnuvegaráðuneytinu og einn af samningamönnum Íslands, tekur til orða. Þótt samningamönnum Íslands væri ekki hleypt að borðinu komu þeir sjónarmiðum sínum rækilega á framfæri, að því er fram kemur í umfjöllun um mál þetta í Morgunblaðinu í dag.