Dró vélarvana skip til Hafnarfjarðar

Stjórnstöð Landhelgisgæslunnar barst beiðni um aðstoð frá fiskiskipinu Kristínu GK síðdegis í gær, en skipið var þá vélarvana um 30 sjómílur vest-norðvestur af Garðskaga. Varðskipið Týr var þá úti fyrir Keflavík og hélt þegar í átt að fiskiskipinu.

Þetta kemur fram í tilkynningu frá Landhelgisgæslunni. Segir í henni að áhöfn varðskipsins hafi skotið línu yfir í skipið á tíunda tímanum í gærkvöldi og að því búnu haldið með það áleiðis til Hafnarfjarðar.

Varðskipið kom með skipið til Hafnarfjarðar snemma í morgun en hafnsögubáturinn Hamar tók þá við og fylgdi því síðasta spölinn að bryggju.