„Full ástæða til að vera ánægður“

Mjög faglega er staðið að smíði nýrra skipa útgerðarfélagsins Bergs-Hugins, Vestmannaeyjar og Bergeyjar, í skipasmíðastöðinni Vard í Noregi. „Full ástæða er til að vera ánægður með vinnubrögðin,“ segir Guðmundur Alfreðsson, útgerðarstjóri Bergs-Hugins.

Guðmundur var ásamt Gunnþóri Ingvarssyni, framkvæmdastjóra Síldarvinnslunnar, í Noregi í síðustu viku þar sem fundað var um smíði skipanna. Segir Guðmundur að smíðin sé nokkurn veginn á áætlun og að flestir verkþættir séu vel á veg komnir.

Alls er Vard að smíða sjö systurskip fyrir íslensk fyrirtæki. Er unnið að smíði Vestmannaeyjar og Bergeyjar í sveitarfélaginu Aukra, ásamt öðru skipi fyrir Útgerðarfélag Akureyringa.

Þannig munu Vestmannaey og Bergey koma til með að líta út.

Skipin eru 28,95 metrar að lengd og 12 metrar að breidd, en tvær 400 hestafla aðalvélar af gerðinni Yanmar verða í skipunum og í þeim verða tvær skrúfur.

Í skipunum verða íbúðir fyrir 13 manns og munu þau geta komið með um 80 tonn af ísuðum fiski að landi, er haft eftir Guðmundi á vef Síldarvinnslunnar.

„Ákvarðanir um val á búnaði og allt fyrirkomulag í skipunum eru teknar í samráði við útgerðirnar og verður lögð áhersla á góða vinnuaðstöðu, góða meðhöndlun á afla og góða orkunýtingu. Gert er ráð fyrir að bæði skip Bergs-Hugins verði afhent eiganda í sumar. Skrokkar skipanna eru smíðaðir í einingum og eru þær gerðar í Salthammer og síðan dregnar á prömmum til Aukra þar sem þær eru settar saman,“ segir Guðmundur.

• Blogga um frétt