Stuttur túr hjá Engey eftir eld í mótor

„Þetta var örstuttur túr. Bara tveir sólarhringar á veiðum enda var verið að stilla okkur af í löndunaráætlunni eftir óhappið á dögunum. Aflinn var hins vegar góður eða rúmlega 60 tonn og þetta var nánast eingöngu þorskur sem við fengum.“

Þetta segir Friðleifur Einarsson, skipstjóri á ísfisktogaranum Engey RE, sem kom til hafnar í Reykjavík í gærmorgun. Fyrir rúmum tíu dögum kviknaði í spilmótor þegar skipið var að veiðum í Víkurálnum. Greiðlega gekk að ráða niðurlögum eldsins og fór síðasta vika í viðgerð á spilmótornum. Tekin voru tíu hol í veiðiferðinni sem skiluðu rúmlega 60 tonna afla.

„Þar sem okkur var ekki ætlaður langur tími að þessu sinni þá sigldum við beint norður í Víkurál með það að markmiði að veiða eitthvað af karfa. Það var hins vegar bara þorskur á ferðinni. Við hófum veiðar í Víkurálnum eftir hádegi á laugardag en fórum svo norður eftir á Halann og enduðum veiðarnar út af Þverál eftir hádegi í gær,“ er haft eftir Friðleifi á vef HB Granda.

„Þar var bara þorskur. Reyndar hafði orðið vart við ýsu og ufsa utarlega á Halanum dagana á undan en sú veiði var búin er við komum á svæðið.“ 

• Blogga um frétt