Aflinn dregst saman um 57 prósent

Fiskafli íslenskra skipa í janúar var 46,6 þúsund tonn, eða 57% minni en í janúar á síðasta ári. Samdráttur aflans skýrist af skorti á loðnu, en engin loðna veiddist í janúar samanborið við 68 þúsund tonn í janúar á síðasta ári.

Þetta kemur fram í tölum sem Hagstofan hefur birt á vef sínum. Botnfiskafli nam tæpum 43 þúsund tonnum í janúar og jókst um 17% miðað við sama mánuð í fyrra. Af botnfisktegundum var aflaaukningin mest í ufsa- og ýsuafla, en þorskafli jókst einnig um 5%.

Heildarafli á 12 mánaða tímabili frá febrúar 2018 til janúar 2019 var rúmlega 1.198 þúsund tonn, sem er samdráttur um 6% miðað við sama tímabil ári fyrr. Samdráttur í afla skýrist eingöngu af minni uppsjávarafla að því er segir á vef Hagstofunnar.

Afli í janúar metinn á föstu verðlagi var 10,8% minni en í janúar 2018.

• Blogga um frétt