„Þetta er bara pólitík og ekkert annað og kom mér ekkert á óvart. Menn ætluðu sér alltaf að fara í hvalveiðar,“ segir Rannveig Grétarsdóttir, formaður Hvalaskoðunarsamtaka Íslands.
Kristján Þór Júlíusson, sjávarútvegs- og landbúnaðarráðherra, gaf í vikunni út reglugerð sem heimilar áframhaldandi veiðar á langreyði og hrefnu árin 2019–2023. Nær ákvörðunin til veiða á fimm ára tímabili, eins og fyrri reglugerð gerði.
Segir stjórnvöld hundsa samtökin
Hvalaskoðunarsamtökin gagnrýna ákvörðun ráðherra, sérstaklega þar sem ekki var leitað til samtakanna í tengslum við ákvörðunina. „Að sjálfsögðu erum við mjög óhress með þetta því það var ekkert samráð haft við okkur,“ segir Rannveig, sem segir jafnframt að Hvalaskoðunarsamtök Íslands séu alfarið hundsuð af stjórnvöldum.
Í því samhengi bendir hún á að ekki var haft samband við samtökin við gerð skýrslu Hagfræðistofnunar Háskóla Íslands um þjóðhagsleg áhrif hvalveiða sem kom út í síðasta mánuði. Sömuleiðis hafi ekki verið haft samband við samtökin vegna ákvörðunar ráðherra um áframhaldandi hvalveiðar. „Við vorum aldrei kölluð að borðinu,“ segir Rannveig.
Þá gerir hún athugasemd við að ákvörðun ráðherra er sögð byggja á ráðgjöf Hafrannsóknastofnunar, en jafnframt með hliðsjón af skýrslu Hagfræðistofnunar Háskóla Íslands um þjóðhagsleg áhrif hvalveiða. „Það var búið að segja að það ætti ekki að nota hana til grundvallar þessarar ákvörðunar en samt er ráðherra að vísa í það núna,“ segir Rannveig. Samtökin hafa gagnrýnt skýrsluna harðlega og segja hana meðal annars „illa studda áróðursskýrslu“.
Hvalaskoðun ekki viðurkennd sem nýting á hval
Ákvörðun ráðherra um hvalveiðar til næstu fimm ára hefur, að mati Rannveigar, ekki eingöngu áhrif á hvalaskoðun heldur á alla ferðaþjónustu yfir höfuð. „Þetta hefur neikvæð áhrif á ímynd landsins.“
Hvalaskoðunarsamtök Íslands funduðu um ákvörðun ráðherra í morgun og býst Rannveig við að þau muni óska eftir fundi með sjávarútvegsráðherra í framhaldinu. „Þetta ýtir undir og í raun staðfestir það að stjórnvöld viðurkenna ekki hvalaskoðun sem nýtingu á hval.“