Brúarfoss og Dettifoss í smíðum

Eimskipafélag Íslands er með tvö gámaskip í smíðum í Kína, sem munu hljóta nöfnin Brúarfoss og Dettifoss. Bæði eru þau 2.150 gámaeiningar að stærð, 180 metra löng og 31 metra breið, samkvæmt fréttatilkynningu frá Eimskip.

Gert er ráð fyrir að skipin verði afhent næsta haust, en smíði þeirra er liður í endurnýjun skipaflotans sem og fyrirhuguðu samstarfi við grænlenska skipafélagið Royal Arctic Line. Skipin eru sögð ríkulega útbúin stjórnbúnaði og umhverfisvænni en eldri skip félagsins.

Frétt af mbl.is

Eimskip fjármagnar skipasmíði

Sjötti Brúarfossinn og sjötti Dettifossinn

Nöfnin Brúarfoss og Goðafoss hafa verið áberandi í sögu Eimskips, en fimmta skip félagsins frá upphafi var nefnt Brúarfoss og kom það á eftir Gullfossi, Goðafossi, Lagarfossi og Goðafossi (II).

Brúarfoss (I) var fyrsta frystiskip Eimskips, smíðað í Kaupmannahöfn árið 1927 og var í þjónustu félagsins allt til ársins 1957. Nýi Brúarfoss verður sjötta skip Eimskips með þessu nafni.

Dettifoss er einnig sjötta skip félagsins með því nafni, en fyrsta skipið var smíðað fyrir Eimskip í Frederikshavn árið 1930 og var í þjónustu félagsins allt til ársins 1945.

Með afhendingu nýrra skipa stefnir félagið á að selja skipin Goðafoss og Dettifoss sem eru 1.457 gámaeiningar að stærð og hafa verið í rekstri Eimskips undanfarin 20 ár. Núverandi Dettifoss mun fá nafnið Laxfoss síðar á þessu ári.

• Blogga um frétt