Hráefnið eins og best verður á kosið

Kolmunnaveiðin vestur af Írlandi hefur gengið vel að undanförnu, þegar veður hefur ekki hindrað veiðar. Síðustu daga hafa skip landað afla í fiskimjölsverksmiðjur Síldarvinnslunnar, bæði í Neskaupstað og á Seyðisfirði, að því er fram kemur á vef útgerðarinnar.

Hákon EA landaði um 1.600 tonnum í Neskaupstað á föstudag og Margrét EA tæplega 2.000 tonnum á sunnudag. Bjarni Ólafsson landaði síðan tæplega 1.700 tonnum á Seyðisfirði í gær.

Verksmiðjur Síldarvinnslunnar hafa nú tekið á móti tæplega 23.000 tonnum af kolmunna á árinu. Alls hefur 17.600 tonnum verið landað í Neskaupstað og 5.200 tonnum á Seyðisfirði.

Von er á rúmlega 5.000 tonnum til viðbótar í dag en Beitir NK er væntanlegur til Neskaupstaðar með rúmlega 3.000 tonn og Börkur NK til Seyðisfjarðar með tæplega 2.200 tonn.

Verskmiðjustjórarnir, Hafþór Eiríksson í Neskaupstað og Gunnar Sverrisson á Seyðisfirði, segja að mjög gott sé að vinna kolmunnann sem berst að landi. Hráefnið sé eins og best verður á kosið. Það sé vel kælt um borð í skipunum og fiskurinn sé sæmilega feitur og vel á sig kominn.

• Blogga um frétt