„Núverandi stjórn og trúnaðarmannaráð hefur með framgöngu sinni gagnvart umbjóðanda mínum og öðrum félagsmönnum virt að vettugi þær lýðræðislegu grunnreglur sem gilda eiga við stjórn stéttarfélaga, eins og segir í niðurstöðum Félagsdóms.“

Þetta segir Kolbrún Garðarsdóttir, lögmaður Heiðveigar Maríu Einarsdóttur, í bréfi til Bergs Þorkelssonar gjaldkera og kjörins formanns Sjómannafélags Íslands. Svarar hún í bréfinu boði Bergs til Heiðveigar um inngöngu aftur í félagið og sæti í samninganefnd og ítrekar það sem Heiðveig sagði í samtali við 200 mílur í gær.

Annars vegar að boð um inngöngu sé óþarft þar sem brottvikningin hafi verið dæmd ólögmæt og hins vegar að hún geti ekki samþykkt að vinna trúnaðarstörf fyrir félag sem stýrt sé af aðilum sem fram til þessa hafi virt lýðræðisleg vinnubrögð að vettugi.

Alveg ljóst sé þá í huga Heiðveigar að til þess að skapa frið, traust og trúverðugleika um störf félagsins verði að fara fram nýjar kosningar. Þá fyrst yrði hægt að taka afstöðu til boða um að starfa í þágu félagsins í nefndum eða öðrum trúnaðarstörfum.

Kemur til skoðunar að stefna að nýju

„Verði félagið ekki við þeirri áskorun að boða til kosninga hið fyrsta kemur til skoðunar að stefna félaginu á ný fyrir Félagsdómi til að knýja á um það, í ljósi afdráttarlausrar niðurstöðu Félagsdóms í máli umbjóðanda míns, að brottvikning hennar úr félaginu sem og regla um þriggja ára greiðsluskyldu til að njóta kjörgengis sé skýrt brot á lögum um stéttarfélög og vinnudeilur.“

Af dóminum verði ekki annað ráðið en að kosningar, sem félagið hafi neitað að fresta á meðan skorið væri úr um lögmæti aðgerðanna, séu þar af leiðandi ólögmætar, þar sem félagið hafi meðal annars borið fyrir sig að Heiðveig væri ekki í félaginu, segir í bréfi Kolbrúnar.

„Það verður að teljast afar sérstakt, svo ekki sé fastar að orði kveðið, að þegar bæði félagsmenn, forkólfar annarra stéttarfélaga og helstu sérfræðingar í málefnum stéttarfélaga og vinnuréttar telji að næstu skref SÍ séu að boða til kosninga, að félagið ætli ekki að fara að leiðbeiningum sér vitrari manna - það hefur að minnsta kosti sýnt sig að brjóstvit þeirra sem hafa tekið ákvarðanir hingað til í þessu máli sé ekki til eftirbreytni.“

Tengdar fréttir

Kjaramál sjómanna

SVG og VM samþykktu samninginn

• Segir samninganefnd vélstjóra sniðgengna
• Felur í sér styttri vinnuviku og aukið mótframlag
• Vélstjórar undirrituðu samning við SFS
• „Ekki kjörstaða að vera í“

» Fleiri tengdar fréttir

• 1 blogg um fréttina

Bloggað um fréttina

• Jóhannes Laxdal Baldvinsson: Sjómannafélag Íslands ehf.