Grásleppuvertíðin hafin

Hugur er í smábátasjómönnum við upphaf grásleppuvertíðar, sem byrjaði klukkan sjö í morgun. Það verð sem gefið hefur verið út er hærra en það sem sást á sama tíma í fyrra að sögn Arnar Pálssonar, framkvæmdastjóra Landssambands smábátaeigenda. Grásleppuverkandinn Sverrir Björnsson ehf. á Siglufirði hefur til að mynda gefið upp 260 krónur fyrir kílógrammið af óskorinni grásleppu.

„Okkur sýnist markaðurinn vera í nokkuð góðu jafnvægi og við erum bjartsýnir á að hann muni gefa sjómönnum góðar tekjur,“ segir Örn í samtali við 200 mílur.